Jaaliyada Reer Somaliland Ee Liverpool Oo Baaq Ka Soo Saaray Mudo Kordhinta Guurtidu Hadyada U Siisay Daahir Rayaale Kaahin

Waxaanu si cad u cambaraynaa xadhiga Guddoomiyaha Xisbiga Kulmiye ee Hargeysa, Mudane Axmed Cumar Cabdillaahi “Xamarji” iyo ugaadhsiga Mujaahid Maxamed Kaahin Axmed. Waxaanu u aragnaa in ay tahay mid an xaq ahayn, waana qalad in cabiraada ra’yigooda iyo run ka sheegida taariikhda dhabta ah ee ummada iyo shakhsiyaadka hoggaanka dalka haya in lagu ugaadhsado. Waxaanuna leehanay taariikhdu maaha wax duugowda, qof walibana wuxuu leeyahay taariikh aan been laga sheegi karin.


Annagoo ah Jaalliyada Qurbo Jooga ah ee reer Somaliland ee ku dhaqan cariga Ingiriiska, gaar ahaan magaalada Liverpool, waxaanu cambaaraynaynaa hab dhaqanka masuuliyiinta iyo xukuumada Somaliland, annaga oo ka duulayna:

Markaanu aragnay in gebi ahaan dalkii marayo xaalad halis ah, dhamaana ay soo noqdeen wixii laga dagaalamay. Markaanu aragnay ku xadgudubka birmagaydada Somaliland iyo mujaahidiintii qaranka xoreeyay karamadooda iyo sharaftooda sida loogu tumanayo.

Markaanu daraasaynay sida maamul xumo, caddaalad darro, xattooyada xoolo dadweyne, ku tumashada xeerarka iyo qawaaniinta dalka, iska-horkeenidda beelaha walaalaha ah ee wada dega dalka, waxa noo muuqatay inay tahay waajib in laga hadlo xaaladan ka tagan dalka Somaliland, mar haddaanu nahay bulshada Qurbo Jooga ah ee Somaliland, dalkana lexejeclo naga hayso.

Waxaanu ka muujinaynaa welwelkayaga, walaaca aanu dareemayno ee uu dalku ku sugan yahay, waxanu u aragnaa qalad, arrin aan si quman looga fekerin, laguse kala kaxaynayo ummada walaalaha, ugaadhsiga mujahidinta, ku xadgudubka xuquuqda muwaadiniinta, ku tumashada distuurka qaranka iyo carqaladaynta geedi socodkii dimoqraadiga ahaa, in uu yahay mid wax yeelo iyo dhaawac u keenaya sumcada Somaliland iyo hidihii iyo dhaqanki lagu soo caano maalay ee nabadaynta Somaliland.

Waxaanu si cad u cambaraynaa xadhiga Guddoomiyaha Xisbiga Kulmiye ee Hargeysa, Mudane Axmed Cumar Cabdillaahi “Xamarji” iyo ugaadhsiga Mujaahid Maxamed Kaahin Axmed. Waxaanu u aragnaa in ay tahay mid an xaq ahayn, waana qalad in cabiraada ra’yigooda iyo run ka sheegida taariikhda dhabta ah ee ummada iyo shakhsiyaadka hoggaanka dalka haya in lagu ugaadhsado. Waxaanuna leehanay taariikhda maaha wax duugowda, qof walibana wuxuu leeyahay taariikh aan been laga sheegi karin.

Waxaanu mar labad u sheegaynaa xukuumada Somaliland in ay arrintaas ka waantoodo, arrimaha loo igmdayna ka shaqayso, kana waantowdo iska horkeenka iyo kala kaxaynta ummada Somaliland, waxaanu leenahay annaga oo ah Jaalliyada Somaliland ee Liverpool, xukuumada Somaliland, ha tixgeliso xurmada ay leeyihiin mujaahidiintii SNM.

Mar kale waxaanu ku celinaynaa caalamkana u sheegaynaa, in ay tahay ku xadgudub xuquuqda Mujaahidiinta iyo Birmagaydada lagula kacayo, si loo kiciyo dadka ama ummada Somaliland iyo intii u soo halgantayba ka naxaysa xurmayn la’aantooda, waana arrin lagu abuurayo nabadgelyo daro ka aloosanta dalka.

Waxaanu shacbiga gudaha jooga kula talinayna in ay si nabdgelyo ah, dareenkooda, shucuurkooda iyo isku duubnidooda ugu muujiyaan mudahaarad silmiya, calamkana tusaan sida ay uga soo horjeedaan xaalad abuurka xukuumada Rayaale dalka ka wado.

Jaalliyada Somaliland ee Liverpool