MAWQIFKA WADA-JIRKA AH EE LABADA XISBI EE KU SAABSAN GO’AANKII KOMISHANKU KU LAALEEN HAWL-WADEENAD

News
Monday, April 07, 2008

UJEEDDO: MAWQIFKA WADA-JIRKA AH EE LABADA XISBI EE KU SAABSAN GO’AANKII KOMISHANKU KU LAALEEN HAWL-WADEENADII XAFIISYADA KOMISHANKA DOORASHOOYINKA


Date: 07/04/2008

KU: KOMISHANKA DOORASHOOYINKA QARANKA

KU: DHAMMAAN SAXAAFADDA MADAXA BANAAN JSL

UJEEDDO: MAWQIFKA WADA-JIRKA AH EE LABADA XISBI EE KU SAABSAN GO’AANKII KOMISHANKU KU LAALEEN HAWL-WADEENADII XAFIISYADA KOMISHANKA DOORASHOOYINKA

Waxay labada Xisbi ee KULMIYE iyo UCID si wada-jir ah halkan ku cadaynayaan, in aanay ogoleyn, raalina ka ahayn go’aanka Tirsigiisu yahay KDQ/XK/513?08 ee ku taariikhaysan 05/04/2008, go’aankaas oo Komishanka Qaranku si xaq-darro ah ugu laaley hawl-wadeenadii Xafiisyadda Komishanka Doorashooyinka ee Gobolladda iyo Degmooyinka Dalka.

Waxa xaqiiqo ahayd oo aan muran ka taagneyn in dacwadda ay isku hayeen Xisbiyadda iyo Komishanka Qaranku ay ku koobneyd sedexda Gobol ee Galbeedka Dalka, ee kala ah Maroodi-jeex, Awdal iyo Saaxil, oo haba yaraatee wax cabasho ah ama dacwad ah oo ka jirey Gobolladda bari (Togdheer, Sool iyo Sanaag) aanay jirin, oo mas’uuliyiintii ka hawl-galey Gobolladaasi si xalaal ah xilkooda u soo guteen, taasoo Wakiiladii sedexda Xisbi iyo Komishankuba ay ku cadeeyeen shirkii Jaraa’id ee ay mas’uuliyiintaasi sida wada-jir ah ugu qabteen xarunta Komishanka, ka dib markay safarkaas ka soo laabteen.

Cabashada labada Xisbi ee mucaaridka ahi ay ka qabaan Gobollada galbeed oo soo taxnayd ilaa maalintii hawshaa loo ambo-baxay, si Xisbiga UDUB ugu gudbo cabasho aan meel mar ahayn oo la xidhiidha Gobolladda bari, wuxuu soo gudbiyey qoraal uu arrintaa kaga hadlaayo 5-tii bisha april, 2008, Ref: UDUB/F/075/08,. Markay gaadhay in komishanku soo saaro go’aan uu liisaskaa kaga saarayo 7-xubnood oo uu u arkay ma-dhaafaan oo ka mid ahaa 27-xubnood oo qoraal wada jir ah oo labada Xisbi Komishanka u gudbiyeen ay hore ugu dureen.

Waxa fajiciso iyo layaab noqotey, in Komishanku aqbaley cabashadii Xisbiga keliya, iskana dhago mareyey inuu qaato go’aan uu u madax bannaan yahay oo uu ku xalilo cabashadii mudada labada bilood ah taagneyd.

Ugu dembayn, waxay labada Xisbi ugu muuqataa in go’aankaa Komishanku ku laaley hawl-wadeenada Komishanka ee Gobollada bari ee loo soo dhaariyey shaqadooda inay burinta uu Komishanku maanta magacaabistoodii buriyaa ay nusqaan ku tahay Komishanka Qaranka laftiisa.

Waxa Komishanka la gudboon inuu hawlihiisa si madax banaan u gutto oo uu ku dhiirado inuu halkii Cabashadu taaley wax-ka-qabto.

MD. AHMED MAXAMED SIILAANYO ENG: FAYSAL CALI WARAABE
GUDDOOMIYAHA XISBIGA KULMIYE GUDDOOMIYAHA XISBIGA UCID