Rabyow , Raxmaanow Dadnimada Aad Noo ABuurtay Noo Daa Oo Ha Na Doorin

Rabyow , Raxmaanow Dadnimada Aad Noo ABuurtay Noo Daa Oo Ha Na Doorin

Waxaa ayaan daro iyo wax laga naxo ah afmiinshaarada aan ku shaqayn mabda’ah iyo wax haba yaraatee damiir ah oo celiyaana aanu jirin. Shakhsiyaadkaas bahdalan ama doorsan ilamaa iyo intii Faqashtu dadka dhibi jirtay ayaa habeen walba la soo tubi jiray Radio Hargeysa sidii maxaabiis lagu soo qabtay dagaal, muhiimada ugu weyn iyo shaqada uu Daahir Rayaale dadkan Kamarada ugu soo dhigaana waxay tahay in Daahir Rayaale ay u caayaan kuwa aan cayda lahayn amaba aan gayin cayda. Qoomna ilaahay ma doorsho hadaanay iyagu is doorin am aanay iyagu is dulayn oo aanay dadnimadooda wax yeelin !

Illahay wuxuu inoo abuuray inaynu saxa iyo qaladka kala garano, afmiinshaarku horta qoys iyo qabiil midna ma leh, cod odaytinimo oo laga dambeeyo iyo awood shacab oo uu cid isku hor taagi karana ma leh, sharaf iyo qiime uu hore u lahaa oo meel u sii yaalayna lali taasna, magac iyo xikmad ka soo baxda oo lagu dhagaysto oo lagu qadariyana ma jirto iyaduna. Waa shakhsiyaad iska nool oo EBBE isagaa wayn oo cadiyada bixiyee iyagii oo nool is duleeyay. Waa maalin ku nool rubuc qad ah xitaa naftooda isku caayi kara amaba qof weyn oo qoyskooda ka soo jeeda.

Waxaa baryahan dambe maamulka Dahir Rayaale wehel u noqday in hantidii qaranku lahaa loogu qayb qaybiyo afmiinshaarada noocaas ah si ay u caayaan madaxda xisbiyada mucaaridka ah. Waxaa caado u noqotay maamulkan Rayaale ee khasaaray wakhtigiisiina sii dhamaanayo inuu hadba raabo raabo dad ah oo maalin ku nool ah isugu soo ururiyo Telifishankii qaranka dabadeedna ka yeedhsiiyo hadalo aan qiimo iyo macno midnaba aan lahayn. Waxaa maalin dhawayd kamarada teeifishanka Hargeysa sii qiimo daran oo bahdalan loo soo tubay kuwo dalka iyo dadkaba dab iyo halaag u horseedayay una sahadinayay dagaal kuwaas oo ku hanjabayay in Siilaanyo iyo Kulmiye ay dagaalka kala baxaan Hargeysa oo Burco la tagaan ! Horta hadalkaasi waa fartii dahir Rayaale iyaguna waxay haayeen sameecadii codka la soo gashaday inay sii dayso, muna aha wax cusub.

Magaalada Hargeysa waa kow, dagaal ka taagni ma jiro mid soo socdana ma ogin EBBANA ha naga hayo bal se afmiinshaarka fulayga ah ee sii baqayow, ninna Hargeysa looga tegi maayo ee waa la wada joogayaa, reer hebelow ka baxa Hargeyasana reer hebel kama baxayaan Hargaysa ee adigaa ku dheeraad ahe ka bax marka hore , tan laga ilbaxye JIIB NOOM TAANI. Hargeysa waa caasimadii dalka lamana kala laha, Sheeganaayow i sa soo sheeg ka aad tahay. Fidnada iyo dab hurinta Daahir Rayaale taariikhda ayay gashay wakhtigeeda ayaana la isla sugi doona wixii laga yeeli doono, afmiinshaar illa gaani iyo Moorgan marba idaacadaha laga qaylisiin jiray ILLAAHAY waxaan uga baryayaa in caafimaad uu siiyo Duligauu isa saarayna ka dul qaado. Aamiin

Dahir Rayaale se waxaan leeyahay saacadaadii way kaa taagan tahay imikadaas, ama diid ama aqbal wakhti kugu filan inaad dalkan soo hogaamiso waa lagu siiyay waxna umaad soo qaban, si wanaagsanna shacabka reer Somaliland madaxtinimadaada intaad haysay habeen muran may galin mucaarid iyo mu’ ayidba, waanay kuu hogaansameen. Xisbiyada mucaridka haday tahayna Siilaanyo 80 cod oo la wada ogaa ayuu kaaga tanaasulay si dalkan shaag ugu rogmo dunidana aynu uga mid noqono. Ogow Daahir Rayaalow Africa iyo aduunyada kale midnaba kamay dhicin 80 cod oo lagu kala dhaqaaqaa, sharafta iyo amaanta guushaasna waxaa lahaa kii ogalaaday ee kugu gacan siiyay oo ah Axmed Maxamed Maxamud Siilanyo xaqna waan u hadlayaa oo Rabbi igu ogyahay shacabka reer Somalilandna waa iiga marag WALLEE taas oo ben kamaan sheegin. Garowshiiyaheedii taa inaad leedahay aniguba kaama filayo kaamana rajaynayo markaan hab u dhaqankaaga maalinlaha ah arakayo. Daahir Rayaale Kahin, markaynu mucaarid iyo Siilaanyaba isla dhaafno waxaa jiray shacab reer Somaliland ah oo fara badana oo codkoodii maalin dhan bacadka u taagnaa inay ku siiyaan, Xagaad shacabkaas dhigtay hadaad daacad tahay? Rajaday qabeen ee ay codkoodii kugu siiyeen dib ma isu waydiisay? Khudbadihii kala duwanaa ee se aad gobol kasta ka akhriday ma xasuusataa waxaan ka ahayn lixda gobol iyo lix iyo tobanka dagmo ee aan waxba cidna u tarayn? Daahir Raayalow bal dalka Somaliland halagu xisaabiyee lixdii sanadood sheeg oo Maxaa la taaban kara eed u qabatay ?
Caasimada Hargeysa tankar dab damis oo dabka bakhtiiya ma u iibisay, caasimadu se ma leedahay ? Madaarka Hargeysa tankar dab damis ah ma leeyahay? kaba kaalay waxan oo dhan, dariiqa qasarka Madaxtooyadaada hor mara siduu u egyahay ayaa wax qabadkaagana laga arki karaa, horaa loo yidhi ninkaad kabaha ka toanayso horta kabihiisa eeg, intaasana igaga kaa filan ! Waxaan ku su’ aalay mudadaad talada dalkan haysay intii ugu yarayd ee aasaasiga ahayd oo aanad waxba ka qaban bal se maxaad madaxtinimada ku doonaysaa hadii aad irbid dun galin kari wayday ? halkaa aad laba milyan oo Doolar $ 2.000.000 oo hantidii cashuur bixiyeyaasha qaranka ah aad ku baab’inayso afmiinshaaro kuu caaya kuwii dalkan soo xoreeyay ma waxaad garan kari wayday wax muuqda gali?

Waxaan ku soo gabagabaynayaa in Daahir Rayaale dalkan ku yimid doorasho, cusboonaysiin wax la yidhaahdana ay raacday shir beeleedkii Mudadii madaweynahan talada dalka haya mudane Dahir Rayaale Kaahin way soo dhamaatay waxayna ku egtahy saqda dhexe ee May 15 saacada 2400 oo ah saqda dhexe, waxaan ku soo gabagabaynayaa in Daahir Rayaale dalkan ka xishoodo oo uu ka daayo hanjabaada ah hadaan madaxnimada la ii dayn Somalilandna way burburaysaa ! Somaliland EBBAA Daahirow wata, adigana EBBAA kuu gartay in aad madaxweyne ka noqoto oo ku keenay Somaliland ma burbuin kartid hadaad is leedahay yaanay kaa dambayn adigu bal ha is burburin, ogow cidii is tidhaa Somaliland burburi ayaa ku burburi doonta hadaanay ka joogin.

Somaliland Ha Noolaato Waligeedna Ha Jirto

Maxamud Caydiid Lafcanbe