Xisbiga KULMIYE oo cambaareeyey kootada ganacsiga xoolaha loogu xidhay Al Jaabiri iyo xadhigga Guddoomiyaha Guddida Ganacsatada xoolaha

Xisbiga KULMIYE oo cambaareeyey kootada ganacsiga xoolaha loogu xidhay Al Jaabiri iyo xadhigga Guddoomiyaha Guddida Ganacsatada xoolaha

Hargeysa (Somaliland.org) – Xisbiga ugu weyn mucaaridka Somaliland ee KULMIYE ayaa cambaareeyey xadhiga Guddoomiyaha Guddida Ganacsatada xoolaha iyo horjeedda heshiiska xukuumaddu ku kootaysay dhoofka xoolaha, kaas oo khilaaf xiisad kulul wata ka oogey dalka maalmahan. Waxana uu uga digey xukuumadda cawaaqib xumo ka dhalan karta siyaasadda muquuninta ah ee ay doonayso inay ku meelmariso heshiiska kootada ganacsiga xoolaha ee ay la gashay ganacsadaha Carbeed ee AL Jaabiri.

Masuuliyiinta xisbiga KULMIYE, shir jaraa’id oo ay shalay ku qabteen xarunta dhexe ee Xisbiga, waxa ugu horrayn ka hadlay mawqifka xisbiga KULMIYE ka taagan yahay xiisadda iyo xaaladda murugsan ee ka dhalatay heshiiska dhoofka Xoolaha, Guddoomiyekuxigeenka 2aad ee xisbiga, mudane Cabdiraxmaan Cabdilqaaddir Faarax, waxana uu ka warramay waxa ay isku hayaan ganacsatada iyo Daahir Riyaale.

“kulankii ugu danbeeyay ee ay wada yeesheen Madaxweynaha iyo Ganacsatada Xooluhu si wanaagsan bay isku afgarteen, oo waxa yidhi waan idiin fasaxay inaad xoolihii dhoofisaan, iyaguna xoolihii way dhoofiyeen 7000 oo neef oo adhi ah ayay dhoofiyeen, waxay ku heleen 52 Doolar, sixirka uu Al-jaabiri ku doonayayna waxa uu ahaa 36 Doolar, markaa Madaxwaynuhu talo wanaagsan buu ku socday oo Al-jaabiri iyo sheekadiisii wuu iska dhaafay, ganacsatadana wuu u ogaaladay inuu dhoofsadaan, markaa waxa ku jira 16 Doolar oo dheeraada ayay meeshaasi ka heleen,” ayuu yidhi Cabdiraxmaan.

Hase yeeshee, waxa uu sheegay in kulan kale oo ay ugu tageen ganacsatadu Daahir Riyaale si ay ugu hambalyeeyaan go’aanka uu ugu fasaxay dhoofka xoolaha ay kala kulmeen wax ka duwan go’aankii hore, isla markaana uu isku rogey, isaga oo u sheegay in Al jaabiri oo keli ahi uu xoolaha qaadanayo, uuna uga soo baryey inuu qiimaha u kordhiyo oo uu ku qaato neefkii $42.

Waxana uu yidhi isaga oo ka warramaya jawaabta ganacsatadu ka bixiyeen go’aankaa dambe ee Riyaale, “Ganacsatadu maanta waxay leeyihiin waxaanu ku helaynaa 60 doolar, marka ay Carrafadu timaadana 90 doolar buu neefka adhiga ahi istaagayaa. Markaa qof 90 doolar ku helaya oo la leeyahay 42 doolar ku qaado, waa xaqdarro aad u weyn, qof weyn oo maskax lehina waxaas kuma taliyo”.

Guddoomiyekuxigeenka 2aad ee xisbiga KULMIYE, mudane Cabdiraxmaan Cabdilqaaddir, waxa uu waxba kama jiraan iyo sasabo been ah ku tilmaamay doodda xukuumaddu ku difaacayso heshiiska Al Jaabiri ee ah in ninkaasi uu dhisayo Maxjar ku kacaya lacag Milaayiin Doollar ah iyo in uu suuragelinayo in xoolaha Somaliland ay toos u tegi doonaan Sucuudiga, Carrafada kadib marka uu dhammaado dhismaha Maxjarku. Waxana uu sheegay in dhismaha Maxjarku aanu wax qiimo ah lahayn, lacagta ku baxaysaana aanay ka badnayn $ 20,000 ilaa $150,000, taas oo uu sheegay in ganacsatada xooluhu ay dhisi karaan. Sidoo kale, waxa uu sheegay in Maxjarka caalamiga ah ee Geeska Afrika ee dowladda Sucuudigu aqoonsan tahay uu yahay Maxjarka Jabuuti, maxjar kale oo ay aqoonsanaysaana aanu jirin, isla markaana Al Jaabiri aanu beddeli karin siyaasadda Boqortooyada.

Waxa kale oo uu wax aan macquul ahayn ku tilmaamay in Al Jaabiri oo haysta kootada xoolaha, uu raashinka daruuriga ahina isagu la wareego, taas oo uu sheegay inay meesha ka saarayso ganacsatada muwaadiniinta ah ee wax soo dejisa.

Mudane Cabdiraxmaan, isaga oo talooyin arrintaas ku saabsan u jeedinaya xukuumadda waxa uu yidhi, “Waxaan leeyahay dowladeenu dadkaa xoolahaa dhaqda mushahar ma siiso, dhakhtar ma siiso, tacliinta kama bixiso, wax alaale iyo wax ay dawladdeenu dadkaa ugu filantahay ma jirto, ninkaa aanad waxba u qabanaynin, ee cashuurna ku siinaya ee adigii meesha kugu haya ee mushahaaradaadu isagu ka jarantahay, waxaan kuu diidayaa in xoolahaagu intii ay kuu goynayeen aad ku hesho, waa dembi wayn, dadnimada kuma jirto, Somalilandnimada kuma jirto, diinta Islaamkana kuma jirto, wax ay dadkeenu inaga galabsadaana maaha, waxaan leeyahay anagu haddii aanu Kulmiye nahay, dadkaa baayacmushtariga ah in ay xoolahooda meesha ay doonayaan ka iibiyaan, oo sicirka ugu badan ku helaan baanu ku taageeraynaa, aanu la jecelnahay oo aanu doonaynaa in ay ku guulaystaan, xaquna waa sidaa”.

Guddoomiyekuxigeenku waxa kale oo uu ka hadlay sida ay u arkaan xadhiga Guddoomiyaha Guddida Ganacsatada, Cabdillaahi Maxamed Cabdiraxmaan oo Axaddii xukuumaddu u xidhay arrimo la xidhiidha khilaafka ka dhashay heshiiska kootada xoolaha iyo xubno kale oo uu sheegay inay yihiin rag magic weyn ku leh dalka oo la sheegay in amar qabasho loo jaray, lana doon doonayo.

“Dawladdana waxaan leeyahay, waxaasi wax soconaya maaha, xadhig aad guddoomiyaha guddida ganacsatada xidhaan waxba ku helimaysaan idinkana socon mayso, waxaana igu maqaalo ah in niman kale oo waawayn oo magacyo leh oo ka mudan Somalilandna la leeyahay waaran baa loo soo jarayaa, una maylayn maayo in ay dawladdu sidaa u caqli yartahay, magacyadaa aan maqlayo in ay halkaa wax gaadhsiinayso u malayn maayo, laakiin xadhig waxba tarimaayo, nin xoolihiisii iibsanaya waan ku xidhayaa meelna lagu gaadhi mayo,” ayuu yidhi Cabdiraxmaan.

Sidoo kale waxa iyaguna halkaasi ka hadlay Mudane Yuusuf Nuur Maxamed (Guruunje) iyo Maxamed Cabdillaahi Cabsiiye oo labaduba ka mid ah masuuliyiinta xisbiga Kulmiye, oo iyaguna si kulul u cambaareeyay heshiiska kootada ah ee Al-jaabiri iyo falka xadhiga ah ee lagula kacay guddoomiyaha guddida Ganacsatada Xoolaha Nool ee Somaliland Mreen Mr. Cabdillaahi Maxamed.

Xigasho /Somaliland.org, Hargeysa.