“Ma waafaqsani in shirweyne labaad la qabto oo hogaanka sare ee Xisbiga Kulmiye lagu loolamo,” Dalmar Saalax, Xubin ka tirsan Golaha Dhexe ee KULMIYE

Hargeysa (Somaliland.org) – Dalmar Saalax Diiriye oo ka mid ah xubnaha Golaha dhexe ee Xisbiga Kulmiye, isla markaana ka mid ahaa dhinicii qaadacay natiijada Shirweynihii Golaha dhexe ee Kulmiye ee dhawaan ka dhacay Mgalaadda Burco, ayaa caddeeyay in uu ka soo horjeedo Shirweyne labaad oo la qabto oo mar kale lagu doorto Musharixiinta Xisbiga uga qaybgalaya doorashada Madaxtooyada. Waxaanu soo jeediyay in khilaafaadka ka dhex jira Kulmiye wadahadal iyo isu-tanaasul lagu dhameeyo.

Dalmar waxa uu sidaa ku sheegay qoraal uu ku socodsiinayay Shirgudoonka Golaha dhexe ee Xisbiga Kulmiye oo uu galabta soo gaadhsiiyay warbaahinta. Qoraalkaasina waxa uu u dhignaa sidan:

“Ku: Shirgudoonka Golaha dhexe ee Xisbiga Kulmiye.

Ujeedo: Cadayn Mawqifka aan ka joogo khilaafkii Xisbiga ee ka dhashay habkii doorashadii musharixiinta iyo masuuliyadihii kale ee ay ka mid ahaayeen Guddida fulinta.

Hadaba, waxaan qabaa in khilaafkaa wadahadal iyo isu tanaasul lagu dhameeyo, tix-gelin iyo raali-gelin laga siiyo kooxda wax tirsanaysa ee ay hogaamo ka yihiin Cabdiraxmaan Aw Cali iyo Axmed Xaaji Cali Cadami.

Hase-yeeshee, ma waafaqsani in shirweyne labaad la qabto oo hogaanka sare ee Xisbiga lagu loolamo, khalad kasta oo jirana loo huro midnimada iyo wada-jirka Xisbiga, haddii se kooxda wax tirsatay ee aan ka midka ahaa ku adkaysato loolan dambe iyo shirweyne kale oo la qabto waxaan cadaynayaa in aanan kula jirin fikirkaas, sexeexaygii horena aan ka noqday kana tanaasulay.

Talo soo jeedin

1-In ay garawshiiyo ka bixiyaan Musharaxa Madaxweynaha iyo hogaankiisu ku deg-degii doorashada.

2-In Munaasib wax ku ool ah loo balan-qaado qaybaha wax tirsanaya”.

Xubno kale oo ka tirsan Golaha Dhexe ee KULMIYE oo magacyadooda lagu saxeexay mooshinka ayaa iyaguna Guddoomiyaha Golaha Dhexe ee KULMIYE u gudbiyey qoraallo ay ku caddaynayaan inay ka noqdeen saxeexaas ama in laga been abuuray magacyadooda.

Xigasho /  C/risaaq M. Dubbad, Somaliland.org, Hargeysa.