Dr Maxamed Cabdi Gaboose Oo Shalay Dalka Dib Ugu Soo Laabtay

“Wax Kasta Oo Carqalad Ah Oo Doorashada Ku Yimaada Waxaan Hubaa Inay Maqaamkeenii Hoos U Dhigi Doonto, Laakin Waxaan Ugu Baaqayaa…”Dr Gaboose

()

hadhwanaag 2009-01-30 (Hadhwanaagnews) Hargeyasa(HWN):-Guddoomiyaha Urur-Siyaasadeedka Qaran Dr.Maxamed Cabdi Gaboose oo wakhtigan la xulafo ah Xisbiga KULMIYE ayaa Galabta si diiran loogu soo dhaweeyey Gegeda diyaaradaha ee Egal International Airport ee Magaalada Hargeysa, kadib markii uu safar hawleed uu ku tagay dalka Mareykanka oo todobaadyo qaatay.

Dr. Gaboose waxa Gegeda diyaaradaha ku soo dhaweeyey Guddoomiyaha Xisbiga Mucaaridka ah ee KULMIYE Axmed Maxamed Maxamuud [Siilaanyo], Gudoomiye kuxigeenka 2aad ee Urur Siyaasadeedka Qaran Jamaal Caydiid, Xildhibaano, aqoonyahano, dhalinyaro iyo marti sharaf kale.

Gudoomiyaha Qaran oo Saxaafada uga waramayey qolka nasashada Madaarka Magaalada Hargeys ayaa waxa uu sharaxaaad ka bixiyey safarkii uu tagay dalka mareykanka, mudadii uu halkaas joogay cida uu la kulmay Iyo waxa ay ka wada hadleen waxaanu yidhi “Waxaan muddo ku maqnaa dalka Maraykanka, waxaanan la kulmay oo shirar la yeeshay jaaliyadda reer Somaliland ee dalkaas joogta, waa dad dalka jecel oo xogta dalka aad ugu baahan, aniguna xogta dhabta ah ee dalka ayaan siiyey ee ah taad ogtihiin ee dhibaatada waddanka taal, sharci-darrada taal, maamul-xumida taal, musuqmaasuqa yaal. Waxa kale oo aan uga warbixiyey in la marayo xilli doorasho, taas oo ah mid aad u muhiim ah,waayo dad ajanebi ah masuuliyiin ah oo aan la kulmay iyo cid kasta oo aad la sheekaysataaba waxaad moodaa doorashadan inay ku qiimaynayaan in Somaliland tallaabo weyn qaadi doonto haddii ay ku dhammaato jawi nabadgelyo, xor oo xalaal ah.” Ayuu yidhi Gudoomiyaha Urur Siyaasadeedka Qaranka Dr. Gaboose.

Gudoomiyaha Ururka Qaran D. Axmed Gaboose wax uu yidhi“Wax kasta oo carqalad ah oo doorashada ku yimaada waxaan hubaa inay maqaamkeenii hoos u dhigi doonto, sidaa daraadeed shacbiga waxaan ugu baaqi lahaa in laga dareemo oo qiimeeyo in doorashadu waqtigeeda ku dhacdo oo aan laga yeelin marmarsiiyo yaryar oo loo maro ri baa halkan lug ku dhufatay iyo wax la mid ah.

Isaga oo hadalkiisa sii watana waxa uu intaa raaciyey oo uu yidhi “Doorashadu inay waqtigeedii ku dhacdaa waa muhiim, haddii aanay waqtigeedii ku dhicin dee waqtiga Rayaale-na halkaasu ku dhammaanayaa oo anigu mabaqababa in sharciyad dambe kala hagayso dadka.”

Gaboose waxa sheegay in Jaaliyadda reer Somaliland ee dalka Maraykanku danaynayaan isbeddel siyaasadeed oo dalka ka dhaca,“Anigu waxaan u tagay Maraykan in taageerayaashii ururka QARAN iyo xisbiga KULMIYE aan uga sheekeeyo heshiiskii wanaagsanaa ee annaga iyo KULMIYE na dhexmaray, taas oo muhiimadda ugu weyn ahayd in xoogga la mideeyo si isbeddel siyaasadeed dalka ugu yimaado. Waxaanse idiinku bushaaraynayaa dadkaan u tagay oo aan islahaa wax ka dhaadhici in wax allaale wixii aan sheegayey inay qalbiga u sii adkayso mooyee dad KULMIYE ah ayaan u tagay oo maanta gacantooda, jeebkooda iyo codkoodaba diyaar u ah in Alle hala qabtee murrashaxa Axmed Siilaanyo uu guulaysto,”

Gudoomiyaha Urur Siyaasadeedka Qaran ee Dr. Maxamed Cabdi Gaboose oo la weydiiyey Su’aal ahayd, mudadii uu Safarka ku marayey Dalka Mareykanka masuuliyiintii uu kulamada uu la yeeshay, waxa uu ku jawaabay oo uu yidhi“Waxaan la kulmay raggii ugu sarreeyey Wasaaradda Arrimaha Dibada qaybteeda Afrika, sida Afrika oo dhan ninka xukuma iyo ka Bariga Afrika xukuma. Markaa berigii nala xidhxidhay carqaladihii aannu la kulanay waatii halkan Jendayi Frazer nagula kulantay way na qiimeeyeen dee aniguna waxaan jeclaaday in aan ku idhaa mahadsanidin, ta labaadna waxay ahayd isbarasho, ta saddexaadna in aan uga waramo xaaladda doorashooyinka iyo ta guudba in aan uga waramo. Runta markaan idiin sheego waxaan la kulmay dad Somaliland aad u jecel, lana jecel doorashadaasi inay ku dhammaato guul, haddii doorashadu guul ku dhammaato Somaliland saaxiib weyn bay dunida ku leedahay oo ah dawladda dunida ugu weyn, waxaynu inagu iska xumayno mooyee xaggaa waa la inaga jecel yahay.”

Mar iyana la weydiiyey Su’aal ahayd Dr. Gaboose waxa ka jira warar sheegaya inuu Socdaalkaagii aad ku tagtay Dalka Mareykanka ay u jeedadiisu ahayd dhaqaale uruurin aad u samaynayso Xisbiga KULMIYE, waxa uu ku jawaabay oo uu yidhi “Wallaahi annagu markaanu heshiiska KULMIYE galnay waxaannu ballanqaadnay in aan milicda (qoraxda) iyo barafkaba u marno sidii uu u guulaysan lahaa xisbigu, waayo himiladii baanu ka dhex aragnay, markaa adigu lacag baad sheegaysaaye wax kasta waanu doonanaynaa.”

Waxa isna halkaasi ka hadlay Guddoomiye-ku-xigeenka labaad ee xisbiga KULMIYE Md. Cabdiraxmaan Cabdiqaadir, ayaa isaguna galabta ka soo laabtay socdaal muddo qaatay oo uu ugu maqnaa dalka Kiiniya.
Xigasho / Hadhwanaagnews.com/Office
Hargeysa/Somaliland
Email: Janaale94@gmail.com

(Dr. Gaboose)