Guddoomiyaha Xisbiga KULMIYE oo ka soo laabtay socdaalkiisii Nairobi

Mudane Silanyo

Mudane Silanyo

Hargeysa (Somaliland.org) – Guddoomiyaha xisbiga siyaasiga ah ee KULMIYE Mudane Axmed Maxamed Maxamuud (Siilaanyo) ayaa dalka dib ugu soo noqday kadib markii uu soo dhamaystay booqasho uu muddo ugu maqnaa dalka Kenya.

Axmed Siilaanyo oo maanta markii uu ka soo degay Garoonka Diyaaradaha ee magaalada Hargaysa shir jaraa’id ku qabtay qolka nasashada ee Madaarka, ayaa sheegay in intii uu joogay magaalada Nayroobi uu kulamo la yeeshay madax farabadan oo uu ka mid yahay Madaxwayne-ku-xigeenka dalkaasi iyo xubno ka tirsan Golaha Wasiirada Kenya, kuwaasi oo ay ka wada hadleen arrimo farabadan oo ay ka mid ahaayeen xaaladda Mandaqada iyo ta Somaliland.

Guddoomiyaha Xisbiga KULMIYE waxa kale oo uu sheegay in uu magaalada Nayroobi kulamo kula yeeshay safaaradaha dawladda Maraykanka iyo Dawladaha reer Galbeedka, Wakiillada Qaramada Midoobay, Midawga Yurub iyo deeq bixiyayaasha Somaliland ka caawiya arrimaha doorashooyinka iyo geedi socodka dimuquraadiyadda, kuwaasi oo uu sheegay in ay aad ugu heelan yihiin in ay Somaliland wax la qabtaan, isla markaana ay si xooga isha ugu hayaan hawlaha loogu diyaar garoobayo doorashooyinka ee Somaliland ka socda.

Mudane Axmed Siilaanyo waxa kale oo uu sheegay in xukuumadda Somaliland ka gaabisay in ay xidhiidh wanaagsan la samayso dawladda Kenya oo door muhiim ah ka ciyaarta arrimaha mandaqada, gaar ahaan Geeska Afrika, waayo ‘buu yidhi’ waxa ay madaxda Kenya wali Wasiirka Arrimaha dibadda u haystaan Edna Aadan, taasina ay tahay nasiib darro.

Mudane Axmed Maxamed Maxamuud (Siilaanyo) waxa uu mahadnaq ballaadhan u jeediyay shacabka Somaliland ee ku dhaqan dalka Kenaya oo uu sheegay in ay si wanaagsan u soo dhaweeyeen.

Guddoomiyaha iyo Weftigii ku weheliyay socdaalkiisa ayaa maanta markii ay ka soo degeen Madaarka Hargaysa waxa si diiran ugu soo dhaweeyey dadwayne aad u tiro badan.

Source/ Somaliland.org, Hargeysa.