Xisbiga Kulmiye Oo Xukuumada Ugu Baaqay In Si Degdeg Ah Loo Sii Daayo Masuulka Ka Tirsan Kulmiye

Warkii 10-Jan-2009 iyo Qormadii: news
Hargeysa-Xisbiga Kulmiye ayaa ku baaqay in si degdeg ah xuquuqdiisa loogu soo celiyo Wasiir ku xigeenkii hore ee Wasaaradda Hawlaha Guud Cabdirashiid Ducaale Qambi oo shalay arooryadii hore xabsiga loo taxaabay, ka dib markii boolisku gurigiisa ugu tageen.

Guddoomiye ku xigeenka labaad ee Xisbiga Kulmiye Cabdiraxmaan Cabdiqaadir Faarax oo xalay khadka talefoonka kula soo xidhiidhay Ogaal, ayaa sheegay inay xadhiga Cabdirashiid isku dayeen wax ka ogaantiisa, balse boolisku aanay sharraxaad ka siin sababta ka damabaysay. “Maanta (shalay) waxa gurigiisa 5:00 arooryo loogu yimi Muwaadin Cabdirashiid Ducaale Qambi oo ahaa Wasiir ku-xigeenkii hore ee Hawlaha Guud, booliska ayaana xidhay.

Markaa maanta (shalay) hadaanu nahay Xisbiga Kulmiye waxaanu ku booqanay saldhiga Koodbuur, waxaana naloo sheegay inaan la cadayn, lana qeexin, wax waaran ah oo maxkamadeed oo lagu xidhayna aanu jirin, isla markaana kiis lagu soo oogay haba yaraatee aanu jirin, balse kiiska ay CID-du wadato. Markaa meel baa lagaga dhacay xuquuqdiisii.” Ayuu yidhi Cabdiramaan Cabdiqaadir. Waxaanu intaa raaciyay oo uu yidhi, “Hadaanu nahay Xisbiga Kulmiye waxaanu leenahay muwaadinkaas oo ka mid ah odayaasha iyo akhyaarta Somaliland, kuna soo biiray Kulmiye dhawaan, xuquudii dastuurku siiyay iyo tii sharcigu siiyayba meel baa lagaga dhacay, iyadoo bilaa waraan lagu soo xidhay. Waxaanu dawlada u sheegaynaa, Madaxweynaha u sheegaynaa, Wasiiru-Daakhiliyaha u sheegaynaa, Garsoorka wadanka u sheegaynaa in muwaadinkaa xuquuqdiisa loo soo celiyo ama maxkamad la soo taago oo loo sheego dembiga loo haysto, hadii kale si degdeg ah loo sii daayo.”

Xigasho Ogaalnews