DALJIRE: “Hindisuu U Ekaa Habartii Jar ka Tuurtay…….” By A. Geeljire

https://i2.wp.com/sallaxleynews.com/1/albums/userpics/geeljire01.jpg?w=620

Dubbe iyo Doolaal duqay weeye magaalo oo dalkooda ilaasha. Waa laba aan kala daalin dariiqna aan wada qaadin. Midba duubka wanaagga dushaasuu ku sitaa iyagaaba is doortay.Waa laba aan debec yeelan oon hadal diirkaba saarin deelqaafna wuu ka dhacaa. Haddana inay is dilaan iyo dudmana loogama yaabo. Waa niman aan dan ka yeelan dadka kay ku arkaan waxay diidan yihiin ee duunkoodu la yaabo derejo uu doono ha yeeshee, kay daafacayaanna inta daaqsinta geela looga soo durki maayo. Ruuxay diiraddoodu haleesho daguugahay ka dhigaan dembina loo qabsanmaayo oo duqoodi Dhanxiirbaa digreetadaa u saxeexay ducana waabu u raacshay. Bartay doodda jilba iyo foodda ay is daraanna waa Danlaawoow mafrishkooda oo ay qadadii dabadeeda iyo duhurka ay ku kulmaan.

Dubbe: Marka ugu horraysa,inkasta oo aan la yar raagay, waxaan salaamayaa bahweynta saxaafadda Somaliland guud ahaan mid dawladadeed iyo mid gaar loo leeyahayba. Waxaan ku salaamayaa maalinta addunka ee xornimada saxaafadda (world press freedom day)oo ku beeganayd 3da May . waxaan u rajaynayaa horumar. Waxaan leeyahay dhallinta noo kacday ee saxaafadda gulaysta. Intaa ka dib waxaan leeyahay qoladiinan hadal haysa Muj. Cali Guray aan wax idiin sheego………

Doolaal: Waar salaamahaaga iska wado waxba Cali Guray kaama Geline.

Dubbe: Iska aamu adigu oo na dhegeyso uun. Horta intaanan arrinta ka hadal aan yarkan inna weydiiyay Cali Gurey ma ninka bidaarta leh baa u jawaabo. Adeer reer magaalka lama yidhaa bidaar bay leeyihiin. Waxa la yidhaahdaa waa laga timo badan yahay. (qolada laga timaha badan yahay). Waa ku sidee dee adeer. Oo anagii baad na soo gashay markaad bidaar tilmaantay eh. Ta kale horta Saaaxiibkay Muj. Cali guray ha la yaabina, sababtoo ah addunyada waxa ugu daran laba qof. Waa qof la yidhi Ina Rayaale afhayeen u noqo iyo mid la yidhi UDUB afhayeen u noqo. Qoodhiin iyo dhediggin ma laba af oo la hayaabaa labadaa af? Horta ka Ina Rayaale ilko Jarmal ah oo walaayati ah baa ku jira oo Germany lagu soo sameeyay oo markaad is tidhaa qabo farahaba lafta iyo jiidhka ayuu is raacinaya oo waa kaw. Dabadeed adna cadha inanta yare e ugu horraysa ee su’aal ku weydiisa ayaad cuna qabanaysaa sidii Siciid Caddaani. Afka UDUBna waa af dekedo dhan iyo guryo dhan iyo hanta umadadeed oo dhan iyo dal dhan lagu guray oo balqay oo markaad dhan yar dabooshaba dhanka kale ayay wax boodayaan….’aaaar qabo. Qoodhyaxaro dhanka kalena ka baxday. Haddaad wax wanaagsan ku hadasho UDUB baa ku qabsanaysa oo ku odhanaysa macquul buu noqday. Haddaad waxooda iyo wax xun ku hadashana dadkii kala dhimate.

Doolaal: Waar dee afhayeenimada ayaad qalad ka fahantay ee macnahu waxa weeye qofka ama ururka yaa afkooda lagu hadlayaa ee maaha gacanta ayaa lagu daboolayaa.

Dubbe: Dee hayee aan ku hadloba eh horta af lagu hadlaa ma ku yaalaa. Bal amuurtan iyo yaabkan eega. Waar iska daa taasoo horta saaxiibkay Muj. Cali Guray markii lagu foodhyay waa laga gar darnaa isna wuu gar darnaa.

Doolaal: Waar ninku gar qaadis xumaa ma reer Mudug baa. Waa maxay wuxuu ku hadlay? Siday laba qof labaduba gar u yeeshaan?

Dubbe: Horta waa laga gar darnaa oo inuu hadalka dhameeyo o la sugaa baa ahayd. Wuxuu yidhi. “liisku waa xaaraan laakiin doorashada waanu ku gelaynaa.” Dadkii oo mooday inuu soo wato doorasho geli maynona way foodhyeen. Haddaba hadday sugaan waxay ogaan lahaayeen wuxuba inuu sahlan yahay oo barnaamijkii xisbiga UDUB ee aynu naqaanay yahay oo aanu ahayn wax cusub.

Doolaal: Waa maxay barnaamijka aad taqaaneen ee UDUB?

Dubbe: Waxa weeeye kii ahaa. “Wuxu waa hanti qaran qaran oo in la cuno waa xaaraan laakiin waanu iska cunaynaa. Guryaha umadda in la iibiyo waa xaaraan laakiin waanu iska iibinaynaa. Lacagta dekedda umaddaa leh oo in lunsadaa waa xaaraan laakiin waanu iska qaadanaynaa. Muwaadiniinta in suuqa lagu toogto oo la laayo iyagoo mudaharaadaya waa xaaraan laakiin waanu iska laynaynaa. Mudda in si sharci darro ah loo korodhsadaa waa xaaraan laakiin waanu iska korodhsanynaa. Inaanu mar hore iska tagnaa bay ahayd laakiin waanu iska joogaynaa.Inaanu guddiyada nabadgelyo darrada adeegsanno oo dadka iska xidhxidhnaa waa xaaraan laakiin waanu iska xidhxidhaynaa. Inaanu Distoorka jebinaa waa xaaraan laakiin waanu iska jebinaynaa. Lacagta maxjarka xadnaa waa xaaaan laakiin waanu iska hadaynaa oo doorasho iyo waxbaa la sheegayaa. Inaanu 2% gobolka sool lunsannaa waa xaaraan laakiin waanu iska lunsanaynaa. Inaanu adhiga nin keliya u xidhnaa waa xaaraan laakiin waanu u xidhaynaa. Inay dadku harraad magaalooyinka iyo miyiba ugu madhaan oo aanan ceelal u qodin waa xaaraan laakiin u qodi mayno. Inaanu warbaahinta xukuumadda dadka ka soo caynaa waa xaaran laakiin waanu iska caayaynaa. Xisbiyada mucaaridka inaanu shiidnaa oo carruur ku soo dirnaa waa xaaraan laakiin waanu iska shiidaynaa. IWM. Markaa walaalayaal ha layaabina UDUB ee codkiina u diida oo mucaaridka siiya.

Doolaal:Waar mucaaridna ma tihidin ee horta maxay Musharraxiintii UCID Addisabba ka dooneen?

Dubbe:Waar waabad i xusuusiyaye horta goormay Axmed Yusuf Yaasin waa musharax noqtay xadhigga oo qofkii yidhaahda C.I D da looga yeedhay?

Doolaal:Oo waayo?

Dubbe:Axmed Siciid Cige miyaanad maqal in C.I.D looga yeedhay markii uu waraysiga la yeeshay Ku-xigeenka? Sirtii baan soo helay dee.

Doolaal:Sir maxay ah?

Dubbe:Miyaad maqashay inay wasiiradii Ina Rayaale u sheegan jiray dhabta libaaxo ay yidhaahdeen reerkii waa kala dareeray ee sida keliya ee lagu soo celin karaa waa inagoo Aw yaasiin ka takhalusna oo nidhaahdna shuruudii caafimaadka ma buuxinayo ee aan ku bedelo nin Habar Yoonis ah. Warkaa caafimaadkana Idriss baa hoosta uga sheegay. Hadda waa sidaan u maqlay illayn lama joogine.

Doolaal:Ma taasaad keentay? Dabeedna?

Dubbe:Dabadeed Jug-soo-Dhacay Jaamac Yaasin baa France loo diray oo la yidhi soo qaad warbixintii caafimaadka. Isna siduu u sii ordayay ayuu gaaldadii ku yidhi. “je suis le secrétaire général du parti dirigeant.” Waxaan ahay Xoghaya Guud ee xisbiga talada haya. “je dois ici recevoir le rapport médical de mon M. candate présidentiel-vice ahmed Yusuf Yasiin.” Waxaan rabaa warbixintii caafimaadka ee musharraxa madaxweyne ku xigeenka.

Doolaal:Oo dabeedna?

Dubbe:ma dabeednada ayuumbaad guri? Dee waxay yidhaahdeen. “quel candidat ? quel vice-président ? sont vous de votre esprit ? Musharraxee dee? Ku-xigeenkee dee? Ma waxbaa kuu dhiman? “ vous ne savez pas que les rapports médicaux sont privés et sont gouvernés par l´acte de vie privée ?” Heedhe malaha waad falantahay aade,miyaanad ogayn in warbixinta caafimaadka ee qofku isga gaar u tahay oo sharci ilaaliyaa jiro?

Doolaal:Oo dabadeedna?

Dubbe:Arrintaadu ma af kala qaadbaa? Dee dabadeed Aw yaasiin bay la soo hadleen oo u sheegeen baa la yidhi ninka sirtiisii raadinaya? Haddaba arrintu halkaas ayay maraysaa. Anaguna sidii waraabihii dhegeystay labada ruux ee isu tilmaamaya halkii awrtu joogtay ee yidhi. “anna waan maqlayaa.” Anaguna waa la soconaa? Huryo (ahn) wuxuu yidhi. “Hindisuu u ekaa habartii jar ka tuurtay hayinkay raranaysay ee Awrka heegada saaran hammo ay tidhi qaado.”

Doolaal:’aar bal ukaadi. Kuwanna ma Cawil bay u fuuleen?

Dubbe:Oo kaa maxay hadal hayntiisa ku falayaa waa Wasiirka jaafaajirriqa eh.

Waa inoo qoraalka xiga haddii Eebbe idmo.

A. Geeljire